Sa ngalan ng Ama, at ng Anak,
at ng Espiritu Santo.
Amen.

Sumasampalataya ako sa Diyos Amang makapangyarihan sa lahat, na may gawa ng langit at lupa.
Sumasampalataya ako kay Hesukristo, iisang Anak ng Diyos, Panginoon nating lahat.
Nagkatawang-tao siya lalang ng Espiritu Santo, ipinanganak ni Santa Mariang Birhen.
Pinagpakasakit ni Poncio Pilato, ipinako sa krus, namatay at inilibing.
Nanaog sa kinaroroonan ng mga yumao. Nang ikatlong araw ay nabuhay na mag-uli.
Umakyat sa langit, naluluklok sa kanan ng Diyos Amang makapangyarihan sa lahat.
Doon magmumulang paririto at huhukom sa nangabubuhay at nangamatay na tao.
Sumasampalataya naman ako sa Espiritu Santo,
sa banal na Simbahang Katolika,
sa kasamahan ng mga banal,
sa kapatawaran ng mga kasalanan,
sa pagkabuhay na mag-uli ng nangamatay na tao,
at sa buhay na walang hanggan. Amen.

Ama namin, sumasalangit ka,
sambahin ang ngalan mo.
Mapasaamin ang kaharian mo,
sundin ang loob mo
dito sa lupa para nang sa langit.
Bigyan mo kami ngayon ng aming kakanin sa araw-araw,
at patawarin mo kami sa aming mga sala,
para nang pagpapatawad namin
sa nagkakasala sa amin;
at huwag mo kaming ipahintulot sa tukso,
at iadya mo kami sa lahat ng masama. Amen.

Aba Ginoong Maria, napupuno ka ng grasya,
ang Panginoon ay sumasaiyo.
Bukod kang pinagpala sa babaeng lahat,
at pinagpala naman ang bunga ng iyong sinapupunan, si Hesus.
Santa Maria, Ina ng Diyos,
ipanalangin mo kaming makasalanan,
ngayon at kung kami'y mamamatay. Amen.

Luwalhati sa Ama, at sa Anak,
at sa Espiritu Santo.
Kapara noong unang-una, ngayon, at magpakailanman,
at magpasawalang hanggan. Amen.

Aba po, Santa Mariang Reyna, Ina ng awa,
ikaw ang kabuhayan at katamisan;
aba, pinananaligan ka namin.
Ikaw ang tinatawag namin,
pinapanaw ng taong anak ni Eba.
Ikaw rin ang pinagbubuntuhang-hininga namin
ng aming pagtangis dito sa lupang bayang kahapis-hapis.
Ay! Aba, pintakasi ka namin,
ilingon mo sa amin ang mga mata mong maawain,
at saka kung matapos yaring pagpanaw sa amin,
ipakita mo sa amin ang iyong Anak na si Hesus.
Santa Maria, Ina ng Diyos,
maawain at maalam at matamis na Birhen.

Ipanalangin mo kami, O santang Ina ng Diyos.
– Nang kami'y makinabang sa mga pangako ni Hesukristong aming Panginoon.

Alalahanin mo, O pinagpalang Birheng Maria,
na 'di kailanman nangyari sa sinumang dumulog sa iyong pagkalinga,
humingi ng iyong tulong, o nanalangin sa pamamagitan mo,
na hindi pinakinggan.
Buo sa ganitong pagtitiwala,
tumatakbo akong patungo sa iyo, O Birhen ng mga birhen, aking Ina.
Lalapit sa iyo,
tatayo sa harapan mo, akong makasalanan at puno ng pighati.
O Ina ng Salitang nagkatawang-tao,
huwag mong hamakin ang aking pagsamo,
ngunit sa iyong awa, dinggin mo at tugunin ako. Amen.

Ipagkaloob mo sa kanila, O Panginoon,
ang walang hanggang kapahingahan,
at lumiwanag nawa sa kanila ang ilaw na walang hanggan.
Mamahinga sila sa kapayapaan. Amen.

O Reyna ng Langit, magalak ka. Aleluya!
– Sapagkat ang minarapat mong dalhin sa iyong sinapupunan. Aleluya!
Ay nabuhay na mag-uli na gaya ng kanyang sinabi. Aleluya!
– Ipanalangin mo kami sa Diyos, Aleluya.

Matuwa ka at magalak, O Birheng Maria, Aleluya!
– Sapagkat tunay na muling nabuhay ang Panginoon. Aleluya!

Manalangin tayo.

O Diyos, na sa pamamagitan ng muling pagkabuhay ng iyong Anak na si Hesukristong Panginoon namin, minarapat mong paligayahin ang mundo, hinihiling namin sa iyo na alang-alang sa Birheng Maria na kanyang Ina ay makamtan namin ang kaligayahan sa buhay na walang hanggan. Sa pamamagitan din ni Kristong aming Panginoon. Amen.

Ang Anghel ng Panginoon ay nagpahayag kay Maria.
– At siya'y naglihi sa gawa ng Espiritu Santo.

Aba Ginoong Maria …

Narito ang alipin ng Panginoon.
– Mangyari nawa sa akin ayon sa iyong salita.

Aba Ginoong Maria …

At ang Salita ay naging tao.
– At nanahan sa gitna namin.

Aba Ginoong Maria …

Ipanalangin mo kami, O Santang Ina ng Diyos.
– Nang kami'y maging dapat sa mga pangako ni Kristo.

Manalangin tayo.

Ipagkaloob mo sa amin, O Panginoon, ang iyong biyaya sa aming mga puso, upang kami na sa pahayag ng anghel ay nakaalam ng pagkakatawang-tao ni Kristong iyong Anak, sa pamamagitan ng kanyang pagpapakasakit at krus ay madala sa kaluwalhatian ng muling pagkabuhay. Sa pamamagitan din ni Kristong aming Panginoon. Amen.

Luwalhati …

Ang Rosaryo ng Awa ng Diyos ay idinadasal sa karaniwang rosaryo. Ang pagkakasunod-sunod ng mga dasal:

1. Tanda ng Krus
2. Ama Namin
3. Aba Ginoong Maria
4. Sumasampalataya

5. Sa malaking butil (kung saan karaniwang idinadasal ang Ama Namin), sabihin:

Amang Walang Hanggan, inihahandog ko sa Inyo ang Katawan at Dugo, Kaluluwa at Pagka-Diyos ng Inyong pinakamamahal na Anak, ang aming Panginoong Hesukristo, bilang pagpapatawad sa aming mga kasalanan at sa mga kasalanan ng buong mundo.

6. Sa maliit na butil (kung saan karaniwang idinadasal ang Aba Ginoong Maria), sabihin:

Alang-alang sa Kanyang masakit na pagpapakasakit, maawa Po Kayo sa amin at sa buong mundo.

7. Sa wakas, sabihin nang tatlong beses:

Banal na Diyos, Banal na Makapangyarihan, Banal na Walang Kamatayan, maawa Po Kayo sa amin at sa buong mundo.

San Miguel Arkanghel,
ipagsanggalang mo kami sa labanan.
Maging proteksiyon ka namin laban sa kasamaan at silo ng demonyo.
Ipinagmamakaawa naming utusan siya ng Diyos;
at ikaw, Prinsipe ng mga hukbo sa langit,
sa kapangyarihang mula sa Diyos,
ipagtabuyan mo sa impiyerno si Satanas
at ang iba pang masasamang espiritung gumagala sa mundo
upang ipahamak ang mga kaluluwa. Amen.

Anghel ng Diyos, aking tagapag-alaga,
na pinagkatiwalaan sa akin ng kagandahang-loob ng Diyos,
tanglawan mo ako ngayon,
ingatan, patnubayan, at gabayan. Amen.

Kaluluwa ni Kristo, pakabanalin mo ako.
Katawan ni Kristo, iligtas mo ako.
Dugo ni Kristo, tigmakin mo ako.
Tubig mula sa tagiliran ni Kristo, hugasan mo ako.
Pagpapakasakit ni Kristo, patatagin mo ako.
Butihing Hesus, dinggin mo ako.
Sa loob ng mga sugat mo, ako'y itago mo.
Huwag mong ipahintulot na mawalay ako sa iyo.
Sa nagpapahamak na kaaway ako'y ipagsanggalang mo.
Sa sandali ng pagpanaw ako'y tawagin mo.
At iyong ipag-utos na lumapit ako sa iyo
upang kaisa ng iyong mga Banal ako'y makapagpuri sa iyo
sa kalangitan magpasawalang-hanggan. Amen.

Dasal na itinuro ng Anghel

Diyos ko, naniniwala ako, sumasamba ako, umaasa ako at iniibig kita! Humihingi ako ng tawad para sa mga hindi naniniwala, hindi sumasamba, hindi umaasa at hindi umiibig sa iyo.

Dasal na itinuro ng Mahal na Birhen

O Hesus ko, patawarin mo kami sa aming mga kasalanan, iligtas mo kami sa apoy ng impiyerno, at dalhin mo sa langit ang lahat ng kaluluwa, lalo na ang higit na nangangailangan ng iyong awa.

Panginoon, gawin mo akong daluyan ng iyong kapayapaan.
Kung saan may poot, hayaan mong magdala ako ng pag-ibig;
kung saan may pagkakasala, ng pagpapatawad;
kung saan may pagkakawatak-watak, ng pagkakaisa;
kung saan may pagdududa, ng pananampalataya;
kung saan may kawalan ng pag-asa, ng pag-asa;
kung saan may kadiliman, ng liwanag;
at kung saan may kalungkutan, ng kagalakan.

O Banal na Guro, hayaan mong hindi ko hanapin
ang mapayapa kundi ang magpayapa;
ang maunawaan kundi ang umunawa;
ang mahalin kundi ang magmahal.
Sapagkat sa pagbibigay tayo tumatanggap;
sa pagpapatawad tayo pinatatawad;
at sa pagkamatay tayo isinisilang sa buhay na walang hanggan. Amen.

Aba, Tagapag-ingat ng Manunubos,
Esposo ng Mahal na Birheng Maria.
Sa iyo ipinagkatiwala ng Diyos ang kanyang bugtong na Anak;
sa iyo nagtiwala si Maria;
sa iyo nagkatawang-tao si Kristo.
O Banal na Jose, ipakita mong ama ka rin namin
at gabayan mo kami sa landas ng buhay.
Magkamit ka para sa amin ng biyaya, awa at tapang,
at ipagsanggalang mo kami sa bawat kasamaan. Amen.

(Papa Francisco, Patris Corde)

Hesus ko, naniniwala akong naroroon ka
sa Kabanal-banalang Sakramento.
Iniibig kita higit sa lahat
at nais kong tanggapin ka sa kaluluwa ko.
Dahil hindi ko ngayon matatanggap ka sa sakramento,
pumasok ka man lamang sa puso ko sa espirituwal na paraan.
Niyayakap kita na parang naroon ka na,
at buong-buo akong nakikiisa sa iyo.
Huwag mong ipahintulot na mawalay akong muli sa iyo.
(San Alfonso de Liguori)

Ipanalangin mo kami, O Santang Ina ng Diyos.
Nang kami'y maging dapat sa mga pangako ni Kristo.
Manalangin tayo.
O Diyos, na ang bugtong mong Anak,
sa pamamagitan ng kanyang buhay, kamatayan at muling pagkabuhay,
ay nagkamit para sa amin ng gantimpala ng buhay na walang hanggan,
ipagkaloob mo, hinihiling namin,
na sa pagbubulay-bulay sa mga misteryo ng Pinakabanal na Rosaryo
ng Mahal na Birheng Maria,
matularan namin ang nilalaman nito
at makamtan ang ipinangako nito.
Sa pamamagitan ni Kristong aming Panginoon.
Amen.